শংকুৰাজ কোঁৱৰৰ সৈতে বাৰ্তালাপ

“প্ৰাঙ্গণ”ৰ প্ৰথম সংখ্যাৰ “বাৰ্তালাপ”ত আমি জনপ্ৰিয় শিল্পী শংকুৰাজ কোঁৱৰৰ সৈতে দূৰভাষযোগে কিছু ভাৱ-বিনিময় কৰিছিলোঁ। অসমৰ সংগীত জগতত এক প্ৰতিশ্ৰুতি সম্পন্ন তাৰকা হিচাপে খোজ দিয়া প্ৰতিভাশালী শংকুৰাজ কোঁৱৰৰ জীৱনৰ কিছু কথা , মনৰ অনুভৱ জানোঁ আহক…
১। অসমৰ যুৱ প্ৰজন্মৰ বাবে সংগীত জগতৰ আপুনি এক উজ্জ্বল “নক্ষত্ৰ” । কিন্তু আপোনাৰ এই সাংগিতীক যাত্ৰা আৰু ব্যক্তিগত জীৱনৰ কথা আমি প্ৰায় একেবাৰেই নাজানো। জন্মৰ পৰা বৰ্তমানলৈ আপোনাৰ এই যাত্ৰাৰ বিষয় জানিব বিচাৰিছোঁ।
উঃ পোনপ্ৰথমে “প্ৰাঙ্গণ”ৰ প্ৰথম সংখ্যাত মোৰ সাক্ষাৎকাৰ গ্ৰহণ কৰাৰ বাবে ধন্যবাদ জনালোঁ।
মোৰ জন্মস্থান টংলা। অৱশ্যে মোৰ দেউতা আৰক্ষী বিভাগত কৰ্মৰত হোৱাৰ বাবে চাকৰিৰ সংক্ৰান্তত আমি বিভিন্ন ঠাইত বাস কৰিছিলোঁ। ওদালগুৰি, টংলা, খৈৰাবাৰী আদি ঠাইত আমি অলপ অলপ সময়ৰ বাবে আছিলোঁ। ১৯৯৫ চনত আমি স্থায়ীভাৱে যোৰহাটলৈ আহিছিলোঁ আৰু তাতেই মোৰ স্কুলীয়া শিক্ষা আৰম্ভ হৈছিল।
সংগীতৰ যাত্ৰাৰ বিষয় ক’বলৈ গ’লে পেছাদাৰী হিচাপে মই ২০১৭ৰ পৰা কাম কৰি আছোঁ। চাবলৈ গ’লে, এই ক্ষেত্ৰত মই যথেষ্ট নতুন আৰু সেইবাবে মই নিজকে প্ৰতিষ্ঠিত শিল্পী বুলি এতিয়াও নাভাবোঁ। অৱশ্যে, শৈশৱৰ পৰাই মই মোৰ ঘৰত এক সাংগীতিক পৰিবেশ পাইছোঁ। ভূপেন হাজৰিকা, জয়ন্ত হাজৰিকা, পাৰ্বতী প্ৰসাদ বৰুৱা, লোকনাথ গোস্বামী আদিৰ গানৰ কেছেট আমাৰ ঘৰত বজোৱা হৈছিল। তেনেদৰেই মই গান গাবলৈ চেষ্টা কৰিছিলোঁ।
মই শাস্ত্ৰীয় সংগীতৰ প্ৰশিক্ষণ লোৱা নাই যদিও সৰুৰে পৰাই গাব পাৰিছিলোঁ। এই সামৰ্থ্য মই প্ৰকৃতিৰ বৰদান বুলিয়েই ক’ম আৰু সেয়া ঘৰৰ মানুহে লক্ষ্য কৰিছিল। গতিকে বিভিন্ন সংগীত প্ৰতিযোগিতাত যোগদান কৰিবলৈ মোক ঘৰৰ পৰা উৎসাহ যোগাইছিল।
যোৰহাটত আমি চাৰিঘৰ সম্বন্ধীয় একেলগে আছিলোঁ। মোৰ দাদা- বাইদেউসকলোৰো সংগীতত ৰাপ আছিল। মোৰ আপাৰ ছোৱালীজনীয়ে হিন্দুস্তানী শাস্ত্ৰীয় সংগীতৰ প্ৰশিক্ষণ লৈছিল। বাইদেউৰ সৈতে ময়ো শিকিবলৈ যত্ন কৰিছিলোঁ। মোৰ আন দুগৰাকী দাদাই পাশ্চাত্য সংগীতৰ অনুৰাগী আছিল। মাইকেল জেকচন, বিটিলছ্, বেকস্ট্ৰীত বয়জ্ , ৱেষ্টলাইফ আদি ৮০-৯০ দশকৰ পপ্ শিল্পী সকলৰ গান তেওঁলোকে শুনিছিল। শ্বিলঙত থকা দাদা এজনে মেটেল সংগীতৰ কেছেট ঘৰলৈ আনিছিল। তেনেদৰে মই বিভিন্ন ধৰণৰ সংগীতৰ সান্নিধ্য লাভ কৰিছিলোঁ।
সেইসময়ত সংগীত মোৰ বাবে এক নিচা আছিল, ইয়াক পেছা হিচাপে ল’ম বুলি মই ভবা নাছিলোঁ। মোৰ পঢ়া-শুনাত ধাউতি বেছি আছিল। ডিব্ৰুগড়ৰ ছল্ট ব্ৰুক একাডেমীৰ পৰা উচ্চতৰ মাধ্যমিক পৰীক্ষাত উত্তীৰ্ণ হৈ মই ইঞ্জিনিয়াৰিং পঢ়িলোঁ। পাছত চাকৰি বাদ দি মুম্বাইৰ পৰা স্নাতকোত্তৰ ডিগ্ৰী লাভ কৰিলোঁ। এই গোটেই সময়ছোৱাত সংগীতৰ লগত মোৰ সম্পৰ্ক চলি আছিল। গতিকে এই পৰিৱৰ্তন হঠাতে হোৱা নাই। আগলৈ কিমান দূৰ আগবাঢ়ি যাব পাৰোঁ, সেয়া সময়ে ক’ব।

২। সংগীতক কেৰিয়াৰ হিচাপে লোৱাৰ পৰিকল্পনা কেতিয়া হৈ উঠিছিল?
উঃ সংগীতক বৃত্তি হিচাপে লোৱাৰ প্ৰথম পৰিকল্পনা মই মুম্বাইত স্নাতকোত্তৰ পঢ়ি থাকোঁতে হৈছিল বুলি ক’ব পাৰি। মই নতুনকৈ এটা ইউটিউব চেনেল ( YouTube channel) খুলিছিলোঁ আৰু মোৰ প্ৰথম গানটো আপলোড কৰিছিলোঁ। গানটো আছিল “কি বেদনাতে”।কলেজৰ অনুষ্ঠানবোৰত মই পৰিবেশন কৰিছিলোঁ। মোৰ সৰুকৈ এটা বেণ্ড আছিল আৰু মোৰ সহযোগীকেইজনে মোক জীৱনত বহুত দিছে। সেই সময়ত কেইবাটাও গানৰ ৰচনা আৰু সুৰ হৈ উঠিছিল যদিও সেয়া দৰ্শকৰ সন্মুখত পৰিবেশন কৰাৰ কোনো পৰিকল্পনা নাছিল। কিন্তু “কি বেদনাতে”ৰ পাছত লাহে লাহে দুই-এটি নতুন গীত মুকলি কৰা হ’ল। ৰাইজে গানবোৰ ভাল পাবলৈ ধৰিলে আৰু বিভিন্ন মহাবিদ্যালয়-বিশ্ববিদ্যালয়ৰ অনুষ্ঠানত পৰিবেশন কৰিবলৈ মোলৈ নিমন্ত্ৰণ অহা হ’ল । তেনেদৰেই সংগীত মোৰ বাবে কেৰিয়াৰ হৈ পৰিল।

৩। আজিৰ যুৱ প্ৰজন্মই শংকুৰাজ কোঁৱৰৰ গান শুনি বহুত ভাল পায়। শংকুৰাজ কোঁৱৰে কাৰ গান শুনি ভাল পায়? আপোনাৰ প্ৰিয় শিল্পী কোন?
উঃ প্ৰথমতে মোৰ গান শুনি ভাল পোৱা সকলোকে আন্তৰিক কৃতজ্ঞতা জ্ঞাপন কৰিছোঁ। তেওঁলোকৰ মৰম আৰু আশীৰ্বাদে মোক আগবাঢ়ি যাবলৈ অনুপ্ৰাণিত কৰে।
মোৰ প্ৰিয় শিল্পী সময়ে সময়ে সলনি হৈ থাকে। শৈশৱৰ পৰাই মোৰ বিভিন্ন ধৰণৰ সংগীতৰ প্ৰতি ৰাপ আছে। অসমীয়া আৰু পাশ্চাত্য সংগীতৰ মহান শিল্পীসকলৰ গীত মোৰ সদায় প্ৰিয়। মই দ্বিতীয় শ্ৰেণীত পঢ়ি থকাৰ সময়ত মোৰ দাদা এজন জুবিন গাৰ্গৰ অনুৰাগী আছিল। তেখেতৰ লগত মই জুবিন গাৰ্গৰ গান শুনিছিলোঁ আৰু মোৰ খুব ভাল লাগিছিল। পৰৱৰ্তী সময়ত পাপনদাৰ গানো মোৰ প্ৰিয় হৈ পৰিল। বৰ্তমান মই “নাইট ট্ৰেভেলাৰ” (Night traveller) নামৰ বেণ্ড এটাৰ গান শুনি আছোঁ। তেওঁলোকে ৮০ দশকৰ ৰেট্ৰ’ সুৰসমূহ পুনৰ্নিমাণেৰে কিছুমান গান মুকলি কৰিছে। তেওঁলোকৰ গীত মোৰ খুব ভাল লাগে।

৪। “নক্ষত্ৰ”ৰ পৰা “নীলাঞ্জনা”লৈ অনুৰাগীসকলে নিশ্চয় আপোনাৰ কণ্ঠৰ এক বিবৰ্তন লক্ষ্য কৰিছে। এয়া গানৰ চাহিদা নে স্বাভাৱিক পৰিৱৰ্তন?
উঃ “নক্ষত্ৰ”ৰ পৰা “নীলাঞ্জনা”লৈ যিটো যাত্ৰা, সেয়া মোৰ বাবে চিৰস্মৰণীয়। দুয়োটা গান ভিন্ন ভাৱপূৰ্ণ। “নীলাঞ্জনা” গানটোৰ মৌলিক পৰিকল্পনা মোৰ নহয়। সেয়া হ’ল ভিদিওটোৰ পৰিচালক ৰণদীপ ভট্টাচাৰ্য আৰু যুদাজিৎ বাগচীৰ। তেওঁলোকৰ সৈতে এয়া মোৰ প্ৰথম সহযোগিতা। এই গানটোৰ মাজেৰে এহাল প্ৰেমিক যুগলৰ অন্তৰংগ মূহুৰ্তৰ আবেগ ছবি আৰু সংগীতৰ মাজেৰে প্ৰকাশ কৰা চেষ্টা কৰা হৈছিল। সেইবাবে হয়তো মোৰ কণ্ঠত বিবৰ্তন এটা লক্ষ্য কৰা হৈছে। আগতে মই এনেধৰণৰ গীত গোৱা নাছিলোঁ। কিন্তু মই মোৰ সীমাবদ্ধতা অতিক্ৰম কৰিবলৈ অহৰহ চেষ্টা কৰোঁ। প্ৰত্যাহ্বানৰ মুখামুখি হ’বলৈ মই সদায় সাজু। তাৰেই এক অংশ হিচাপে “নীলাঞ্জনা” গানটো গাবলৈ প্ৰয়াস কৰিছিলোঁ।

৫। বৰ্তমান অসমৰ সংগীত জগতখনত কিছুমান তথাকথিত শিল্পীৰ গানৰ কথা বৰ পুতৌজনক। তেনে সময়ত আপোনাৰ গানৰ সবল শব্দাৱলীয়ে সকলোৰে মন চুই যায়। এই বিষয়ে আপুনি কি ক’ব? লগতে আপোনাৰ গানবোৰ লিখাৰ আঁৰৰ প্ৰক্ৰিয়া জানিব বিচাৰিছোঁ।
উঃ সংগীতৰ বিভিন্ন প্ৰকাৰ আছে আৰু প্ৰত্যেক বিধৰে শ্ৰোতা আছে। কিন্তু সকলোৱে সকলো ধৰণৰ সংগীত ভাল নাপাবও পাৰে।
কিন্তু আমি যেতিয়া ব্যৱসায়িক ভিত্তিত গানৰ ভিদিও এটাৰ নিৰ্মাণৰ কথা কওঁ, তাত বৃহৎসংখ্যক লোক জড়িত হৈ থাকে। প্ৰযোজক, পৰিচালক , অভিনেতাৰ পৰা আৰম্ভ কৰি কেমেৰামেন, মেক্ আপ শিল্পী, নৃত্যশিল্পী ইত্যাদি বিভিন্ন ধৰণৰ লোকে ইয়াৰ জৰিয়তে নিজৰ পৰিয়ালক পোহপাল দিয়ে। তেনে পৰিপ্ৰেক্ষিতৰ পৰা চাবলৈ গ’লে অন্য চাকৰিয়াল দৰে নিজৰ কাম কৰি আছে।
আনহাতে, স্বতন্ত্ৰ সংগীতত (independent music) বেছি মানুহৰ প্ৰয়োজন নাই। মোৰ গীতসমূহৰ অধিকাংশ কাম মই নিজেই কৰোঁ। মই ভাবোঁ যিসকলে মোৰ গান শুনি ভাল পায়, তেওঁলোকে সদায় শুনিব। মোৰ সংগীতৰ ধাৰণা মূলতঃ কাব্যিক। মই কবিতা লিখিও ভাল পাওঁ, পঢ়িও ভাল পাওঁ। অন্য কিছুমান গীতৰ কথা মই প্ৰত্যক্ষভাৱে “পুতৌজনক” বুলি নকওঁ যিহেতু তেনেকুৱা গানে বহুত সংখ্যক লোকক আকৰ্ষণ কৰি আছে। এই আকৰ্ষণ কিয়, সেয়া নিশ্চয় ভাবিব লগীয়া।

৬। মৈত্ৰেয়ী পাটৰৰ সৈতে আপোনাৰ যুগলবন্দী যথেষ্ট সমাদৃত। “প্ৰজেক্ট বাৰ্তালাপে” অসমৰ সংগীত জগতত এক আলোড়নৰ সৃষ্টি কৰিছে। এই বিষয়ে আপুনি কি ক’ব?
উঃ মৈত্ৰেয়ী পাটৰৰ অবিহনে মোৰ সংগীত যাত্ৰা আধৰুৱা। “প্ৰজেক্ট বাৰ্তালাপ” মৈত্ৰেয়ী পাটৰ আৰু শংকুৰাজ কোঁৱৰৰ “ব্ৰেইনচাইল্ড” (brainchild) বুলি ক’ব পাৰি। মুম্বাইত আমি একেখন কলেজত পঢ়িছিলোঁ। বিশ্ব প্ৰতিবন্ধকতা দিৱসৰ ( world disability day) অনুষ্ঠানত আমি একেলগে পৰিবেশন কৰিছিলোঁ। ভাষা আৰু কথন সম্পৰ্কে আমি আলোচনা কৰিছিলোঁ। সাধাৰণতে আমি মনৰ অনুভৱ আৰু আবেগ- অনুভূতিৰ আদান-প্ৰদানৰ বাবে ভাষাৰ ব্যৱহাৰ কৰোঁ। কিন্তু যদি ভাষা নাথাকিলেহেঁতেন, তেতিয়া কি হ’লহেঁতেন? সংগীত এনে এক মাধ্যম যাৰ সহায়ত পৃথিৱীৰ যিকোনো ব্যক্তিৰ সৈতে মানসিক সম্পৰ্ক স্থাপন কৰিব পাৰি । আৰু সংগীতৰ বাবে ভাষা কেতিয়াও আটাইতকৈ গুৰুত্বপূৰ্ণ হ’ব নোৱাৰে। কেনেদৰে সংগীত, ছবি আদিৰ মাধ্যমেৰে বাৰ্তালাপ হ’ব পাৰে? সেই ধাৰণা লৈয়ে “বাৰ্তালাপ” গীতটো ৰচনা কৰা হৈছিল। তাত দুটি মূল চৰিত্ৰৰ মাজত ব্যৱধান থকা স্বত্বেও একেটি গানেই একে সময়তে গাইছে। এই প্ৰজেক্টটোৰ অন্তৰ্গত কেইবাটাও গীত আছে। আমি লাহে লাহে গীতবোৰ মুকলি কৰিম ।
মৈত্ৰেয়ী পাটৰ এগৰাকী খুব প্ৰতিভাশালী কবি, গীতিকাৰ আৰু গায়িকা। আমি কেইবাখনো কলেজৰ অনুষ্ঠানত একেলগে পৰিবেশন কৰিছোঁ। আগলৈও আমি এই যাত্ৰা অব্যাহত ৰাখিম।

৭। ইনষ্টাগ্ৰামত আপুনি এদিন “জলপ্ৰপাত”ৰ ৰচনাৰ আঁৰৰ কাহিনী প্ৰকাশ কৰিম বুলি কৈছিল। সেই বিষয়ে জানিবলৈ আমাৰ পাঠকসকল নিশ্চয় আগ্ৰহী হ’ব।
উঃ প্ৰায় তিনিবছৰ আগতে “কি বেদনাতে” মুক্তিলাভ কৰাৰ তিনি-চাৰিমাহমান পাছৰ কথা। অভি শইকীয়া নামৰ যুৱক এজনে মোক ফেচবুকত এদিন মেচেজ কৰিলে। তেওঁ “ৰেইনফৰেষ্ট ৰেকৰ্ডছ” ইউটিউব চেনেলটো নতুনকৈ খুলিছিল। চেনেলটোৰ বেনাৰত বনোৱা গীতসমূহ তেওঁ মোলৈ পঠিয়াই দিলে। গানবোৰ শুনি মোৰ ভাল লাগিল। সেই সময়ত ইলেক্ট্ৰনিক সংগীত (electronic music) অসমত বেছি প্ৰচলিত নাছিল। মই তেওঁৰ গীতবোৰত এক নতুন সোৱাদ পালোঁ। লগে লগে মই তেওঁৰ সৈতে গীত নিৰ্মাণ কৰিবলৈ উৎসাহিত হ’লো। সেই সময়ত মই মুম্বাইত আছিলোঁ আৰু তাতেই গীতটো ৰচনা কৰিছিলোঁ। আমি কেৱল ফোনেৰে যোগাযোগ কৰিছিলোঁ; ইজনে সিজনক তেতিয়ালৈ লগ পোৱা নাছিলোঁ। গানটো তেনেদৰে ৰেকৰ্ড কৰি মুকলি কৰা হ’ল। আমি দেখিলোঁ ৰাইজে গানটো আদৰি ল’বলৈ ধৰিছিলে। ৰাইজৰ মৰম-আদৰত আমি যথেষ্ট উৎসাহিত হ’লো। কেইমাহমান পাছত মই অসমলৈ আহোঁতে অভি শইকীয়াক প্ৰথম লগ পাইছিলোঁ। ইনষ্টাগ্ৰামৰ “ষ্টোৰী”ত মই এদিন “জলপ্ৰপাত”ৰ ৰচনাৰ আঁৰৰ কাহিনী প্ৰকাশ কৰিম বুলি কৈছিলোঁ। তাৰ ভিদিঅ মই প্ৰস্তুত কৰি আছোঁ। অনতিপলমে মই ভিদিঅটো মুকলি কৰিম।

৮। অভি শইকীয়াৰ সৈতে “ৰেইনফৰেষ্ট ৰেকৰ্ডছ”ৰ বেনাৰত আপুনি বৰ সুন্দৰ গান অসমবাসীক উপহাৰ দিছে। অনুৰাগী হিচাপে, আপোনালোক দুয়োগৰাকীৰ এই যুগলবন্দী পৰৱৰ্তী সময়ত আকৌ কেতিয়া দেখিবলৈ পাম বুলি আশা কৰিব পাৰোঁ?
উঃ আমাৰ গানকেইটা ৰাইজে আঁকোৱালি লোৱাৰ বাবে আমি সদায় কৃতজ্ঞ। আমি ইতিমধ্যে নতুন গীত এটিৰ কাম আৰম্ভ কৰিছোঁ। অতি সোনকালেই গীতটোৱে মুক্তিলাভ কৰিব। প্ৰায় এবছৰ পাছত আমি আকৌ একেলগে গান সৃষ্টিৰ কাম হাতত লৈছোঁ। আশা কৰোঁ “নক্ষত্ৰ” আৰু “জলপ্ৰপাত”ৰ দৰে এই গীতটোও ৰাইজে আদৰি ল’ব।

৯। “পঞ্চায়ত” নামৰ জনপ্ৰিয় ৱেব ছিৰিজখনত আপুনি ” হিয়াঠো” নামৰ হিন্দী গানটোত কণ্ঠদান কৰিছে যাৰ সংগীত পৰিচালনা কৰিছে অনুৰাগ শইকীয়াই। “অনুৰাগ শইকীয়া কালেক্টিভ বেনাৰৰ” প্ৰথম গীতটোতো আপুনি কণ্ঠদান কৰিছে। এই সহযোগিতাৰ সম্পৰ্কে জানিব বিচাৰিছোঁ।
উঃ অনুৰাগ শইকীয়া এগৰাকী খুবেই প্ৰতিভাশালী সংগীত পৰিচালক আৰু অসমৰ সুযোগ্য সন্তান। তেখেতে এতিয়ালৈকে মুম্বাইত কেইবাখনো বোলছবিৰ লগতে ৱেব ছিৰিজৰ সংগীত পৰিচালনা কৰিছে। অনুৰাগ দা আৰু মোৰ প্ৰথম সহযোগিতা হৈছিল ‘পঞ্চায়ত’ নামৰ ৱেব চিৰিজখনত। তাত তেওঁ সংগীত পৰিচালনা কৰিছিল আৰু মই এটা গানত কণ্ঠদান কৰিছিলোঁ। অনুৰাগ শইকীয়াৰ নিচিনা এগৰাকী শিল্পীৰ সৈতে কাম কৰি বহুত কথা শিকিবলৈ পাইছো আৰু নিজকে সৌভাগ্যশালী বুলি ভাবোঁ।
নতুনকৈ তেওঁ ‘অনুৰাগ শইকীয়া কালেক্টিভ” (Anurag Saikia Collective) বুলি এটা প্ৰকল্পৰ কাম হাতত লৈছে। তাত তেওঁ বিভিন্ন শিল্পীৰ সৈতে কাম কৰিব। এই ” অনুৰাগ শইকীয়া কালেক্টিভ”ৰ প্ৰথমটি গীত “কুকুহা”ত মই কণ্ঠদান কৰিছো। গীতটো ৰচনা কৰিছে প্ৰতিভাশালী গীতিকাৰ ৰাহুল গৌতম শৰ্মাই।

১০। আপোনাৰ বলিউডৰ সংগীত জগতখনত খোজ দিয়াৰ কিবা পৰিকল্পনা আছে নেকি?
উঃ এতিয়ালৈকে বলিউডৰ সংগীত জগতখনত খোজ দিয়াৰ মোৰ কোনো পৰিকল্পনা নাই। মোৰ নিজৰেই কেইবাটাও নতুন নতুন গীতৰ কাম বাকী আছে। বৰ্তমান মই বিশেষকৈ স্বতন্ত্ৰ সংগীতত (Independent Music) মনোনিবেশ কৰি আছো; পিছলৈ দেখা যাওঁক।

১১। সংগীতৰ বাহিৰেও আপুনি আৰু কি কি কৰি ভাল পায়?
উঃ সংগীতৰ বাহিৰেও মই ৰন্ধা-বঢ়া কৰি ভাল পাও। সৰুতে মই ছবি আঁকিবলৈ শিকিছিলোঁ যদিও মাজতে বাদ পৰি গ’ল। এতিয়া তলাবন্ধৰ সময়ত আকৌ নতুনকৈ শিকি আছো। মাজে মাজে মই দুই-এখন কিতাপো পঢ়োঁ বা চিনেমা চায়ো ভাল লাগে।

১২। “নক্ষত্ৰ” গানটোৰ সৃষ্টিত আপুনি অভি-নীল হত্যাকাণ্ডৰ পৰা কিছু প্ৰভাৱান্বিত হৈ বিশ্ব শান্তিৰ কথা কৈছিল। আপোনাৰ আনবোৰ গানতটো সামাজিক বা ৰাজনৈতিক পৰিঘটনাৰ প্ৰসংগ আমি বিচাৰি পাওঁ নেকি? যদি পাওঁ, কোনটো গানত কেনেদৰে পাওঁ?
উঃ মোৰ গীতবোৰ সাধাৰণতে খুব ব্যক্তিগত হয়। জীৱনৰ অভিজ্ঞতা আৰু অনুভৱবোৰ আৰ্হি হিচাপেলৈ গীতবোৰ লিখা হয়। পোনপটীয়াকৈ সামাজিক বা ৰাজনৈতিক পৰিঘটনাৰ প্ৰসংগলৈ গীত লিখা হোৱা নাই যদিও ইয়াৰ অনুপ্ৰেৰণা নুই কৰিব নোৱাৰি, নক্ষত্ৰ ইয়াৰ এক উদাহৰণ।
এইখিনিতে মই আৰু এটা গীতৰ কথা ক’ব বিচাৰিছোঁ। গীতটো হৈছে ‘ৰণলে যাওঁ’। এগৰাকী ব্যক্তিয়ে নিজৰ ঘৰৰ পৰা কৰ্মক্ষেত্ৰলৈ ওলাই যোৱাৰ সময়ত হোৱা অনুভৱ বা ভাবৰ বুৰবুৰণীবোৰকলৈ আৰু নিজৰ জীৱনটোক যুদ্ধক্ষেত্ৰৰ লগত তুলনা কৰাৰ এক চিন্তাৰে গীতটি লিখা হৈছিল। গীতটো “কা” বিৰোধী আন্দোলনৰ পূৰ্বেই মুক্তি লাভ কৰিছিল যদিও বহুতে গীতটো আন্দোলনৰ বিষয়ে লিখা বুলি ধাৰণা কৰিলে। সেয়েহে “কা” প্ৰতিবাদৰ সময়ত এই গীতটোৱে বেলেগ এটা পৰিপ্ৰেক্ষিতত বহুলভাৱে প্ৰচলিত হয়। ঘটনাটো কাকতালীয় আছিল যদিও অসম তথা অসমবাসীৰ সুৰক্ষাৰ চিন হিচাপে এই গীতটো ব্যৱহাৰ হোৱা বাবে মই নিজকে ধন্য মানিছোঁ।
চমুকৈ ক’বলৈ গ’লে, বেছিভাগ ক্ষেত্ৰতে মোৰ গীতবোৰ ব্যক্তিগত । কিন্তু এটা কথা উপলব্ধি কৰিছোঁ যে মই যিহেতু এই সমাজখনতে জন্মলৈ ইয়াৰে ভাষা-মাটিৰ সৈতে ডাঙৰ দীঘল হৈছো, গতিকে সৃষ্টিসমূহত কিছুমান সামাজিক বা ৰাজনৈতিক পৰিঘটনাৰ প্ৰভাৱ থকাটো নিশ্চিত। শিল্পীৰ এজনৰ সৃষ্টিয়ে ঘাইকৈ সামাজিক পৰিবেশ প্ৰতিফলিত কৰে। লগতে এজন শিল্পী(Practitioner of Art) হিচাপে নিজৰ ভাষা, জাতি আৰু সমাজখনক সংৰক্ষণ কৰাটো মোৰ দায়বদ্ধতা বুলি মই ভাবো কাৰণ জাতি বা সমাজক তাৰ শিল্পবোৰৰ দ্বাৰা চিনাক্ত কৰা হয়।

১৩। আপোনাৰ আগন্তুক প্ৰকল্প “মাই প্লাগিন”ৰ বিষয়ে জানিবলৈ বিচাৰিছোঁ।
উঃ “মাই প্লাগিন” (My Plugin) এক অনলাইন মাধ্যম যাৰ দ্বাৰা প্ৰতিভাশালী বিভিন্ন ধৰণৰ শিল্পসমূহ সংৰক্ষণ তথা প্রদর্শন কৰা হ’ব। ইয়াৰ ৱেবছাইটটোত কেইবাটাও অংশ থাকিব। তাৰ ভিতৰত চাক্ষুস কলা (Visual Art) এটা অংশ হ’ব। তাত বিভিন্ন চিত্ৰ আৰু ভাস্কৰ্য শিল্পৰ প্ৰদৰ্শন কৰা হ’ব। লগতে সাহিত্যৰো এক অংশ থাকিব য’ত বিশ্বৰ বিভিন্ন চুটিগল্প, নিবন্ধ , লিখিত সাক্ষাৎকাৰ ইত্যাদি পঢ়িবলৈ পাব। সংগীত,চুটিছবি আদিয়ো তাত প্ৰদৰ্শন কৰা হ’ব। কেইবাজনো দক্ষ ব্যক্তিয়ে এই ৱেবছাইটো নিৰ্মাণ কৰি আছে।
কেৱল অসমৰে নহয় সমগ্ৰ উত্তৰ-পূৰ্বাঞ্চল আৰু ভাৰতৰ শিল্পৰ বাবে ই এক মঞ্চ হ’ব। পাৰিলে বিশ্বৰ বিভিন্ন প্ৰান্তৰ ভিন্ন সংস্কৃতি আৰু শিল্পকলা সমূহ ইয়াত প্ৰদৰ্শন কৰাৰ প্ৰয়াস কৰা হ’ব কাৰণ শিল্প আৰু কলাত ভাষা কেতিয়াও প্ৰাচীৰ হ’ব নোৱাৰে।

১৪। ভৱিষ্যতে আমি শংকুৰাজ কোঁৱৰৰ পৰা আৰু কি কি আশা কৰিব পাৰোঁ?
উঃ বহুকেইটা গান মুক্তি দিবলৈ আছে। তলাবন্ধৰ সময়ত বহুকেইটা নতুন গীতৰ সৃষ্টি হৈছে, লাহে ধীৰে সকলোবোৰ মুক্তি দিয়া হব। এতিয়া মই নিজৰ সংগীতক লৈয়ে ব্যস্ত আছোঁ। অৱশ্যে বিভিন্ন শিল্পীৰ সৈতে সহযোগিতাত কাম কৰাৰ এক পৰিকল্পনা আছে। ৰাইজক নিজৰ গীতৰ মাজেৰে আনন্দ দিবলৈ চেষ্টা কৰি যাম, ৰাইজৰ পৰা পোৱা মৰমৰ বাবেই আজি ইমানখিনি আগবাঢ়িবলৈ সক্ষম হৈছো।

১৫। ভৱিষ্যতৰ বিষয়ে পূৰ্বানুমান কৰা কঠিন যদিও, আপোনাৰ কল্পনাৰ অসমীয়া সংগীত জগতখন কেনেকুৱা? তাত আপুনি নিজৰ স্থান কেনেকুৱা হ’ব বুলি আশা কৰে? (অনুৰাগী হিচাপে আমি আপুনি এই গুৰুত্বপূৰ্ণ ভূমিকা পালন কৰিব বুলি আমি বিশ্বাস কৰোঁ!)
উঃ মই ভাবোঁ অসমীয়া সংগীত উদ্যোগৰ ভৱিষ্যত খুব উজ্জ্বল। কেইবাগৰাকীও কম বয়সৰ উদীয়মান শিল্পীয়ে ভাল কাম কৰি আছে। এয়া এক উৎসাহজনক চিন। আমাৰ উপৰি পুৰুষসকলে দি থৈ যোৱা গানৰ ভঁৰাল চহকী হৈ আছে। ক্ৰমাৎ হেৰাই যাবলৈ ধৰা আপুৰুগীয়া অসমীয়া শব্দবোৰৰ পুণৰ প্ৰয়োগ হৈ আছে। এই গতিত আগবাঢ়িলে সংগীত জগতখন নিশ্চয় উজলি উঠিব।
এই ক্ষেত্ৰত শ্ৰোতাসকলৰো দ্বায়িত্ব আছে। তেওঁলোকে নতুন শিল্পী আৰু নতুন ধৰণৰ গানৰ প্ৰতি সঁহাৰি জনাব লাগিব। যিসকল শিল্পীয়ে স্বতন্ত্ৰভাৱে সংগীত সৃষ্টি কৰি আছে, তেওঁলোকৰ গানবোৰ ছেয়াৰ কৰি উৎসাহ যোগাৱা উচিত। ইয়াৰ বাবে মই যথেষ্ট আশাবাদী।
ভৱিষ্যতে মই এটা বিশেষ স্থান পাবই লাগিব বুলি কোনো পৰিকল্পনা নাই। কিন্তু মোৰ অসমীয়া সংগীতক বিশ্ব দৰবাৰলৈ লৈ যোৱাৰ সপোন আছে। ভাৰতবৰ্ষৰ আগশাৰীৰ শিল্পীৰ সৈতে একেলগে কাম কৰাৰ প্ৰবল ইচ্ছা আছে। মোৰ “নীলাঞ্জনা” গানটো “2020 Bokeh South Africa International Lifestyle Fashion Film Festival”ত আনুষ্ঠানিকভাৱে অন্তৰ্ভুক্ত হৈছে। গতিকে এয়া মোৰ সপোন পূৰ হোৱাৰ বাটত প্ৰথম খোজ যেন মোৰ অনুভৱ হৈছে। আগলৈ কাম কৰি থাকিম, দেখা যাওক কিমান দূৰ আগবাঢ়িব পাৰোঁ।

নিজৰ ব্যস্তসূচীৰ পৰা আমাক এইখিনি সময় দিয়াৰ বাবে শংকুৰাজ কোঁৱৰৰ ওচৰত আমি চিৰকৃতজ্ঞ। আগন্তুক দিনত তেওঁ আমাক আৰু সুন্দৰ গীত উপহাৰ দিয়ক তাৰ কামনা কৰিছোঁ। “প্ৰাঙ্গণ”ৰ তৰফৰ পৰা তেখেতলৈ শুভেচ্ছা আৰু অভিনন্দন জনালোঁ।

কাৰ্ণট ইঞ্জিনৰ কথাৰে
কাৰ্ণট ইঞ্জিন

6 COMMENTS

  1. অশেষ ধন্যবাদ। প্ৰশ্নসমূহ বৰ সুন্দৰ হৈছে।

  2. শংকুৰাজ দাদাৰ বিষয়ে ইমানবোৰ কথা জানিব পাৰি খুবেই ভাল লাগিল। ধন্যবাদ Prangon । আগলৈ আৰু এনেকুৱা interview পাম বুলি আশা থাকিল।

  3. শংকুৰাজ দাৰ বিষয়ে জানিব পাই ভাল লাগিল ৷তেওঁ মোৰ প্ৰিয় ৷ধন্যবাদ প্ৰাঙ্গণ ৷

  4. শংকু দা আপোনাৰ বিষয়ে জানিব পাৰি সঁচাকৈ ভাল লাগিল।

LEAVE A REPLY

Please enter your comment!
Please enter your name here